ឯកឧត្តម ម៉ុង មុនីចរិយា ប្រធានសាលាឧទ្ធរណ៍ និង ឯកឧត្តម ហួត វុទ្ធី អគ្គព្រះរាជអាជ្ញា ក្នុងនាមជាអនុប្រធានប្រចាំការ និងអនុប្រធានក្នុងក្រុមការងារទី២ ចំណុះឱ្យគណៈកម្មការដឹកនាំ និងអនុវត្តយុទ្ធនាការជំរុញ និងពន្លឿនការដោះស្រាយរឿងក្ដីនៅតាមតុលាការ (សរសេរអក្សរកាត់ថា គ.ជ.ព) បានអញ្ជើញចូលរួមជាមួយ ឯកឧត្តម សួន វិសាល រដ្ឋលេខាធិការ និងជាប្រធានក្រុមការងារទី២ នៃ គ.ជ.ព ក្នុងការចុះអនុវត្តការងារនៅតាមសាលាដំបូងក្នុងតំបន់ដែនសមត្ថកិច្ចនៃសាលាឧទ្ធរណ៍ត្បូងឃ្មុំ
កាលពីសប្តាហ៍ទី២ នៃខែកុម្ភៈ ឆ្នាំ២០២៤ ក្រុមការងារទី២ នៃ គ.ជ.ព បានចុះអនុវត្តការងារនៅសាលាឧទ្ធរណ៍ត្បូងឃ្មុំ, សាលាដំបូងខេត្តត្បូងឃ្មុំ និងសាលាដំបូងខេត្តកំពង់ចាម។
ក្រោយមកទៀត ក្នុងសប្តាហ៍ទី៣ គិតចាប់ពីថ្ងៃទី១២ ដល់ថ្ងៃទី១៦ ខែកុម្ភៈ ឆ្នាំ២០២៤ ក្រុមការងារក៏បានបន្តចុះអនុវត្តការងារនៅតាមសាលាដំបូងក្នុងតំបន់ដែនសមត្ថកិច្ចនៃសាលាឧទ្ធរណ៍ត្បូងឃ្មុំ ដែលក្នុងនោះរួមមាន សាលាដំបូងខេត្តក្រចេះ, សាលាដំបូងខេត្តមណ្ឌលគិរី, សាលាដំបូងខេត្តរតនគិរី, សាលាដំបូងខេត្តស្ទឹងត្រែង, សាលាដំបូងខេត្តព្រះវិហារ និងចុងក្រោយគឺសាលាដំបូងខេត្តកំពង់ធំ ដោយមានការចូលរួមពី សមាជិកក្រុមការងារ, ឯកឧត្តមអនុប្រធានសាលាឧទ្ធរណ៍, ឯកឧត្ដមប្រធានសាលាដំបូង, ឯកឧត្ដមព្រះរាជអាជ្ញា ព្រមទាំងលោក លោកស្រី ចៅក្រម ព្រះរាជអាជ្ញារង ក្រឡាបញ្ជី និងប្រធាន អនុប្រធានលេខាធិការដ្ឋាន និងប្រធានការិយាល័យពាក់ព័ន្ធ។
ក្នុងជំនួបនេះផងដែរ, ក្រុមការងារទី២នៃ គ.ជ.ព បានទទួល និងស្នើសុំសាលាដំបូងក្នុងតំបន់ដែនសមត្ថកិច្ចនៃសាលាឧទ្ធរណ៍ត្បូងឃ្មុំ ឱ្យផ្តល់ជូននូវស្ថិតិសំណុំរឿងដែលនៅសល់កំពុងចាត់ការទាំងអស់ រួមមានសំណុំរឿងរដ្ឋប្បវេណី និងព្រហ្មទណ្ឌ ជាពិសេសគឺការណែនាំអំពីការបំពេញនូវទម្រង់របាយការណ៍រួម ដើម្បីធ្វើរបាយការណ៍មកគណៈកម្មការវិញ។ ម្យ៉ាងវិញទៀត ក្រុមការងារ ក៏បានស្នើសុំផងដែរ នូវផែនការសកម្មភាពត្រីមាស ប្រចាំឆ្នាំ២០២៤ និង២០២៥ ព្រមទាំងផែនការចំណាត់ការរឿងក្តីរបស់ចៅក្រម និងព្រះរាជអាជ្ញា, បញ្ជីវត្តមានមន្ត្រីតុលាការប្រចាំថ្ងៃ និងរបាយការណ៍សំណុំរឿងអាទិភាពដូចជាគ្រឿងញៀន ចរាចរណ៍ និងអត្រានុកូលដ្ឋាន ជាដើម ដើម្បីគណៈកម្មការ មានលទ្ធភាពក្នុងការរៀបចំរបាយការណ៍រួមដាក់ជូនគណៈបញ្ជាការនៃយុទ្ធនាការ។
ក្រៅពីកិច្ចប្រជុំរួមខាងលើ ក្រុមការងារក៏បានធ្វើការដោយផ្ទាល់ជាមួយចៅក្រម ព្រះរាអាជ្ញាផងដែរ ដើម្បីរិះរកមធ្យោបាយអនុវត្តយុទ្ធនាការជំរុញ និងពន្លឿនការដោះស្រាយទទួលបានជោគជ័យ។
ព័ត៌មានផ្សេងៗ
ក្រុមការងារមហាអយ្យការអមសាលាឧទ្ធរណ៍ត្បូងឃ្មុំ ដឹកនាំដោយ ឯកឧត្តម ហៀង សុភក្ត្រ អគ្គព្រះរាជអាជ្ញារង នៃមហាអយ្យការអមសាលាឧទ្ធរណ៍ត្បូងឃ្មុំ បានចុះធ្វើអធិការកិច្ចនៅពន្ធនាគារខេត្តស្ទឹងត្រែង
ក្រុមការងារមហាអយ្យការអមសាលាឧទ្ធរណ៍ត្បូងឃ្មុំ ដឹកនាំដោយ ឯកឧត្តម ហៀង សុភក្ត្រ អគ្គព្រះរាជអាជ្ញារង នៃមហាអយ្យការអមសាលាឧទ្ធរណ៍ត្បូងឃ្មុំ បានចុះធ្វើអធិការកិច្ចនៅអយ្យការអមសាលាដំបូងខេត្តក្រចេះ
ការចុះពិនិត្យដល់ទីតាំងផ្ទាល់ ដោយក្រុមការងារសាលាឧទ្ធរណ៍ត្បូងឃ្មុំ ស្ថិតនៅចំណុចភូមិបឹងដែង ឃុំព្រែកកក់ ស្រុកស្ទឹងត្រង់ ខេត្តកំពង់ចាម
